LAOAG CITY – Umaboten iti 512 a pamilia ti naibakwit kas paset iti panagsagsagana ti Ilocos Norte iti pangta nga idadalyasat ti bagyo Ompong ditoy probinsia.
Basar iti report a naipadanon iti Provincial Disaster Risk Reduction Management and Resiliency Council kaaddoan ti manipud ti ili a Pagudpud nga umabot iti 87 a pamilya wenno 430 nga indibidual.
Malaksid iti nadakamat nga ili, 81 met a pamilia ti naibakwit iti ili a Pasuquin wenno kaibatugan iti 286 nga indibidual ken maysa ti siudad ti Batac.
Naibakwit dagitoy iti kaasitgan a pagadalan kadagiti pagtaengan da malaksid iti pamilia a naibakwit iti siudad ti Batac a naipan iti City Hall ken dagiti naibakwit idiay Sitio Bungro, Brgy. Pragata ti ili a Pasuquin a napan nakipagnaed pay laeng kadagiti kabagyan da.
Naammoan a dagiti naibakwit ket bukbuklen ti tallo ribu innem a gasut walopulo ket tallo a tattao.
Impasingked met ni Provincial Social Welfare and Development Officer Mrs. Lilian Rin nga awan met ti problema iti kanen dagitoy gapu ta adda met ti nasapa a naited a “prepositioned relief goods” kadagiti Local Government Units gapu iti pammilin ni Gob. Imee Marcos ken dagitoy ti mabalin a pangalaan da ti maited kadagiti naibakwit.
