LAOAG CITY – Umaboten iti 80 a ribo dagiti baro a registered voters iti intero a rehiyon uno.
Segun kenni Atty. Joel Gines, Provincial Election Officer a nasdaaw da iti kinaado dagiti nagrehistron ken saanda a ninamnama daytoy.
Kunana nga amangan no ad-ado ngem ti target da a 100 a ribo a baro a registered voters ti mairekord da agingga a malpas ti voters registration.
Nupay kasta, patien na a daytoy ti epekto ti satellite registration ta maiyasideg iti publiko.
Naamoan nga iti maikadwa nga aldaw ti panagparehistro ditoy probinsya ket napan dagiti staff ti Commission on Election iti dakkel a mall ditoy ciudad ken iti maikatlo ket iti dakkel a mall iti ili ti San Nicolas.
Inbatad na a sabali pay dagiti agturturong a mismo iti opisina da.
Kabayatanna, inpakaammo na a ti kaadwan a mapmapan ket dagiti agtutubo ken sumagmamano laeng dagiti agpare-activate.
Maipalagip a nangrugi ti voters registration idi Agosto uno ken agngudo daytoy intono Agosto 10 ita a tawen.
Mainaig iti daytoy, umabot metten ti 1.4 milyon dagiti nakapagparehistro iti intero a pagilyan, naaratapan nan ti target a 1 milyon.
