LAOAG CITY – Umaboten iti 1,002 nga ubbing ti natay ken nasurok a 187,000 ti nagsakit gapu iti kagrabean nga outbreak ti kamuras iti Bangladesh.
Basar iti US Centers for Disease Control and Prevention (CDC), ti nasao a pagilian ti kaadoan ti panagwaras ti kamuras iti intero a lubong iti agdama.
Namonganay ti krisis iti panagkurkurang ti bakuna gapu iti panagbalbaliw dagiti policy ken political crisis idi 2024 ken 2025.
Nupay 18 milyon nga ubbing ti nabakunaan iti emergency drive idi Abril, sumuruk-kumurang nga uppat a milyon paylaeng ti saan a nabakunaan.
Ad-adda manen a marigatan dagiti ospital gapu ta nairana pay ti panagado ti kaso ti dengue iti nasao a pagilian.
Agtultuloy met nga agbirbiruk dagiti health team kadagiti ubbing a saan pay a nabakunaan tapno maliklikan ti pannakatay da.
