LAOAG CITY – Inbatad ti National Disaster Risk Reduction and Management Council (NDRRMC), nga agtultuloy nga umad-ado ti bilang dagiti pamilya nga apektado ti nakaro nga El Niño iti nagduduma a paset ti pagilian.
Basar iti kaudian a datos ti NDRRMC, umaboten iti nasurok nga 104,000 pamilya wenno katukad ti nasaurok a 388,000 nga indibidwal ti direkta a naapektaran ti nasao a tikag.
Kaadoan a nakairekordan dagiti pamilya a naapektaran ti nakaro a tikag ket iti rehiyon ti Cagayan Valley, sumaruno ti Caraga, Calabarzon, ken Bicol Region.
Gapu iti nakaro nga epekto ti tikag iti suplay ti danom ket pagbiagan, agtalinaed ti 106 a lokal a gobierno iti babaen ti State of Calamity.
Karaman kadagiti nagdeklarar iti State of Calamity ket iti probinsya ti Occidental Mindoro, Sultan Kudarat, ken Maguindanao, karaman ti sumagmamano a paset ti Palawan, Cebu, ken Zamboanga City.
