LAOAG CITY – Umaboten iti 40 a porsiento ti herd immunity wenno nasurok a 30 ribo nga indibidual ti nakabakuna iti 1st dose ti covid-19 vaccine ditoy ciudad ti Laoag idinto a nasurok a 20 ribo dagiti nakakumpleton ti bakuna na.
Segun ken ni Doctor Joseph Adaya, ti City Health Officer ditoy ciudad, agtultuloy ti iyus-uswat ti lokal a gobierno a mass vaccination gapu ta agtultuloy latta ti panagsangpet ti bakuna.
Inpakaammo ni Adaya a malaksid iti rinibo nga sputnik ken moderna vaccine a simmapnet ditoy ciudad itay napan a lawas nga isu ti manarimaan nga ibakbakuna da iti agdama ket manamnama maawat da iti sumaruno a lawas ti agarop uppat a ribo a doses ti sinovac.
Innayon na nga iti average ket umab-abot iti nasurok a sangaribo ti mabakbakunaan iti kada aldaw ditoy ciudad ti Laoag.
Kabayatanna, nagpanawagan ti opisyal nga itultuloy latta dagiti residente ditoy ciudad ti Laoag ti agtungpal iti naited kadakuada nga schedule tapno saan da nga agdudupudop iti vaccination sites.
