LAOAG CITY – Umaboten iti uppat nga indibidual ti pimmusay idinto a nasurok a 50 a sabsabali dagiti nasugatan kalpasan ti napasamak a panagbomba iti Dimaporo Gymnasium iti Mindanao State University idiay Marawi City itay bigat.
Napasamak ti insidente iti oras ti alas-7:30 itay bigat bayat ti misa a naiyuswat iti gymnasium nga inatendaran dagiti estudyante ken mangisursuro.
Mainaig iti daytoy, naikabil ti emergency room iti regional hospital iti Marawi City iti code blue gapu kadagiti matamtaming a nasugatan iti insidente.
Segun ken ni Ist Infantry Division Commander, Major General Gabriel Viray III a karaman kadagiti pimmusay ket tallo a babbai ken maysa a lalaki.
Manarimaan met a maag-agasan iti Amay Pakpak Medical Center ti agarop 42 a nasugatan idinto a dagiti walo ket adda iti Infirmary ti Mindanao State University.
Kuna ni Viray a saan da pay a naestablisar ti signature ti bomba gapu ta agtultuloy paylaeng ti imbestigasyon.
Innayon na a possible a terorista a Dawlah Islamiyah Maute group ti adda iti likudan ti napasamak a panagbomba.
Kabayatanna, naiget a kinondenar ni Lanao del Sur Governor Mamintal “Bombit” Alonto Adiong Jr. ti insidente ken inkari na ti pannakaipaay ti hustisya para kadagiti biktima.
Inpalgak na nga iti masakupan na a probinsya ket itandudo da dagiti kangrunaan a karbengan ti tao no sadinno a karaman ditoy ti kalintegan iti relihiyon.
Indanun pay a dagus ti gobernador ti pannakipagladingit na iti pamilya dagiti pimmusay gapu iti ibilang na kas “senseless act of violence and terrorism”.