LAOAG CITY – Umaboten ti 1,107 ti kaso ti covid-19 idiay New Zealand, 1,006 dagiti nakarekobre idinto a 13 ti nairekord a natay.
Daytoy ti inreport ni Bombo International Correspondent Adonis Yasana, taga San Nicolas, Ilocos Norte ngem agdama nga agtrabtrabaho idiay South Island, New Zealand.
Segun ken ni Yasana, agtrabtrabaho daytoy iti farm ken aggatgatas da kadagiti baka.
Inlawlawag na a maibilang nga Essential Service ti trabaho na isut gapu na nga agtultuloy ti panagtrabaho na iti baet a naipatungpal ti lockdown iti nasao a pagilyan gapu iti covid-19.
Kuna na nga ado dagiti Pilipino idiay New Zealand a nagsardeng a nagtrabaho kas kadagiti karpintero, builders ken dadduma pay.
Nupay kasta, inbaga na nga amin a naapektaran ti trabaho na idiay New Zealand ket tulungan ti gobierno.
Kabayatanna, gapu iti lockdown ket dagiti laeng mapan aggrocery wenno gumatang ti agas ti mapalubusan a rumuar ken maysa laeng a miembro ti kada household ti rumuar.
Inbaga ni Yasana a dagiti aglabsing ti pagalagadan kabayatan ti lockdown ket agmulta ti maysa agingga ti dua a ribo a dolyar ken possible a mabalud pay depende iti kadagsen ti basol.
