LAOAG CITY – Inpakaammo ni Dr. Rodrigo Catcatan, mangidadaulo ti City Health Office nga umad-adu dagiti pasiente nga agturturong iti opisinada.
Gapu iti daytoy, nagpalagip ni Dr. Catcatan iti publiko kangrunaanna kadagiti umili ditoy siudad ti Laoag a masapul a tagibenen ti bagi tapno nasayaat ti salun-at.
Inbatadna a dagitoy a pasiente ket makapaspasar ti uyek, panateng ken gurigor nga isu ti kangrunaan a sakit ita a nalamiis ti paniempo.
Kunana a kasapulan a papigsaen ti resistensia babaen iti pannangan kadagiti nasusustansia a taraon, panagwatwat, panagtumar ti bitamina ken liklikan ti panagbisyo kas iti panagsigarilio ken dadduma pay.
Innayonna a napateg ti panagpakonsultar iti doktor tapno maipaayan ti agas ken maammoan no ania dagiti rumbeng nga aramiden para iti naan-anay a panagimbag.
