LAOAG CITY – Ado manen dagiti aglaklako iti igid ti kalsada iti centro ti ciudad ti Laoag nangruna kadagiti aglaklako ti gift wrappers ken dadduma pay a Christmas decorations.
Daytoy ket iti baet nga adda ti maipatpatungpal a road clearing wenno pannakaipawil dagiti nga sidewalk vendors.
Segun kenni Atty. Charito Malicad, ti officer in charge ti Business Permit and Licensing Office (BPLO) a natuso unay dagiti maseknan isut gapo na a plano na nga iyimplementar ti panakaipataw ti pannusa wenno multa kadagitoy nga umabot iti sangaribo a pisos.
Inpakaammo na nga iti laeng napalabas a lawas ket nasita manen dagitoy babaen iti clearing operation team a bukbuklen ti nasao nga opisina, community affairs, Philippine National Police ken iti Treasury ngem nagsubli dagitoy.
Patien na a rumbeng a mapaigetan ti panakaimplementar ti panakaipawil dagiti sidewalk vendors gapo ta ti kalsada ket maibilang a pagdalyasatan laeng dagiti lugan ken pagnaan dagiti tattao.
Innayon na a plano na nga isuhestIyon ti panagtalinaed dagiti kameng ti road clearing operation team tapno adda ti nakasagana a mangpatalaw kadagiti aglabsing ti nasao a pagganurotan.
