LAOAG CITY – Inpasigurado ti Philippine Red Cross nga adda ti umdas a suplay ti dara ken alisto a pannakaipadanon ti serbisio medikal para kadagiti agkasapulan kas sungbat iti baet ti panagngato ti kaso ti dengue ditoy pagilian.
Kalpasan ti pannakaideklara ti Ormoc City ti state of calamity gapu iti health emergency, inpasingked ni Philippine Red Cross Chairman ken Chief Executive Officer Richard Gordon iti publiko iti panagsagsagana ti organisasion a solbaren ti situasion.
Ti panangideklara ti Ormoc City iti state of calamity ket kalpasan ti 225% a panagngato ti kaso ti dengue maidasig iti kapada a panawen iti napalabas a tawen.
Idiay Quezon City, inyetnag met ti City Health Office ti alarma kalpasan a naduktalan kadagiti 12 a barangay kas dengue hotspots.
Kinumpirmaran ti Department of Health a ngimmato ti 33% ti kaso ti dengue iti intero a pagilian ita a tawen no idasig iti kapada a panawen idi 2023.
Malaksid pay iti panagukkon iti dara, nakasentro pay ti Philippine Red Cross kadagiti proactive health measures.
