LAOAG CITY – Addan ditoy Pilipinas ti dua nga overseas Filipino workers (OFWs) manipud West Bank territory ti Palestine gapo iti buteng iti gubat iti nagbaetan ti Israel ken Hamas militants.
Karaman dagiti dua iti ummuna a batch ti repatriates manipud West Bank ken simmangpet da iti Ninoy Aquino International Airport (NAIA) Terminal 1 idi laeng rabii.
Basar iti report, adda pay ti 23 a Pilipino ti nagtalinaed iti West Bank, ken uppat kadagitoy ti nangipadanon ti intensyon na a makaawid metten iti pagilyan.
Malaksid kadagiti dua, adda pay ti siyam a Pilipino manipud met iti Lebanon ti simmangpet idi rabii gapo met laeng iti amak da iti tensyon iti nagbaetan ti Israel ken Hezbollah militants.
Maysa ditoy ni Chara Jean Amor, a nagtrabaho idiay Lebanon iti uneg ti innem a bulan kas domestic worker ken kunana napalaos ti panagamak na iti mapaspasamak isut gapo na a nagdesisyon nga agawid babaen iti tulong ti gobierno ti Pilipinas.
Maipalagip nga idi Oktubre 21, inkabil ti Department of Foreign Affairs (DFA) iti Alert Level 3 ti Lebanon, a kayat na asawen ket boluntaryo ti repatration kadagiti Pilipino.
