LAOAG CITY – Inrakuraken ti organizers ti Metro Manila Film Festivals dagiti sumagmamano a pelikula a nakipaset ita a tawen. Indauluan ti action-drama a “The Kingdom” a pagbidaan ni Vic Sotto.
Daytoy ti umuna a gundaway a simmabak ti aktor iti Metro Manila Film Festivals kalpasan ti lima a tawen no sadinno ti naudi ket idi pay laeng 2019 a “Mission Unstapabol: The Don Identity” a kaduana idi ni Maine Mendoza.
Maikadua ti pelikula nga “And The Breadwinner Is” a pagbidaan da Vice Ganda, Eugene Domingo ken Jhong Hilario.
Karaman pay ti pelikula nga “Himala: isang Musical: a pagbidaan da Aicelle Santos idinto dagiti dua a pelikula a karaman ket ti “Green Bones” a pagbidaan da Sofia Pablo ken Dennis Trillo ken ti maudi ket ti “Strange Frequencies: Haunted Hospital” a pagbidaan da Jane De Leon ken Enrique Gil.
Inbatad ni Metro Manila Development Authority Chairman Romando Artes nga adda ti 39 scripts ti naisubmitir kadakuada ken gapu ta maika-50 a tawen ita ket nagdesisionda nga aramiden a 10 ti pelikula a makipaset maidasig iti napalabas a walo laeng.
Maipalagip nga iti napalabas a tawen ket addaan ti pakabuklan a biruk a sumurok maysa a bilyon a pisos ti 10 a pelikula a naartapanda ti rekord idi 2018.
