LAOAG CITY – Inpakita ti Vatican ti umuna a ladawan ni Pope Francis kabayatan nga adda pay laeng isuna iti ospital nga addan ti sumurok maysa a bulanen ti napalabas.
Iti nasao a ladawan, makita ti agkarkararag ti agtawen ti 88 a Santo Papa iti chapel ti Gemelli hospital idiay Rome.
Makita pay a nakasuot ti stole wenno ti bado dagiti padi tunggal adda ti misa.
Basar iti Vatican, daytoy ti umuna a gundaway a nagbalin a concelebrator wenno nangidaulo iti misa iti chapel ti Santo Papa.
Agtultuloy ti panagagas ken therapies ti Santo Papa no sadinno ket saanda pay a masinunuo no inton ano a palubusan dagiti doktor ni Pope Francis nga agsubli iti Vatican.
Maipalagip a ti agtawen ti 88 a Santo Papa ket naitaray iti ospital idi Pebrero 14 gapu iti pneumonia.
Daytoyen ti maibilang a kabayagan a nagtalinaed iti ospital sipod idi nagtugaw iti puesto, addan ti 12 tawenen ti napalabas.
Iti naipatulod a mensahe daytoy iti linawas nga Angelus prayer a nagyaman isuna kadagiti agkarkararag iti alisto a panagimbagna.
Adda dagiti sumagmamano nga agtutubo ti naguummong iti sango ti ospital ken nagkararag ti Angelus a sumagmamano kadakuada ket adda ti intugotda a sabsabong ken lobo.
Kinissayan met dagiti doktor ti panangikabil kadagiti non-invasive mechanical ventilation gapu ta simmayaaten ti panagangesna.
Kabayatanna, uray adda iti ospital ket nangipakita ti senyales ti Santo Papa iti panagtalinaed iti puesto no sadinno nga inaprobaranna ti tallo a tawen a reporma iti Simbaan Katolika.
