LAOAG CITY – Nakapasar ti kaawan ti kuryente iti sumagmamano a paset ditoy probinsya iti umuna a parbangon ti misa de gallo.
Basar iti report, nagalanganin a nagturong dagiti residente iti ili ti Sarrat iti simbaan gapu iti kinasipnget ti aglawlaw ken dagiti silaw laeng iti lugan ken flashlight ti mangmangted ti lawag ti aglawlaw.
Nupay kasta, kalpasan ti sumagmamano nga oras ket naisubli met laeng ti serbisyo ti kuryente ken natalged a nalpas ti umuna a Misa de Gallo.
Kabayatanna, nagtalinaed a nagusar dagiti dua a simbaan iti sentro ditoy siudad ti Laoag ti generator para iti umuna a pannakaiwayat ti misa de gallo at adu a tatao dagitui nagatendar.
Nagbalin a natalged ti umuna nga aldaw ti Misa de Gallo ditoy probinsya.
Inbatad ni Engr. Dionisio James, manager ti Engineering Department iti Ilocos Norte Electric Cooperative (INEC) iti Vintar Road ditoy ciudad ti Laoag a nadadael ti maysa nga arrester a 69KV a poon a nagawan ti kuryente.
Kunana nga inapektaran na ti kagudwa ditoy ciudad ti Laoag, Sarrat ken Marcos-Tanggaoan.
Kiniddaw ni James iti panagan-anus dagiti umili iti panagawan ti kuryente gapu ti pannakauram ti arrester.
