LAOAG CITY – Nagballigi ti umuna nga aldaw ti pannakaisayangkat ti 3-Day National Vaccination Drive ditoy Ilocos Norte.
Daytoy ti naragsak nga inpakaammo ni Dr. Norman Rabago, ti Provincial COVID-19 Consultant ditoy probinsya.
Segun kenkuana, kadagitoy a gundaway ket awan pay ti pinal a datosda kadagiti nabakunaan iti umuna nga aldaw ti vaccination drive.
Inlawlawag na nga awan pay ti naawat na a pinal a datos manipod kadagiti nagduduma a Local Government Units a nakaisayangkatan ti nasao a programa.
Kuna na a mabalin a makumikom pay laeng dagiti City ken Municipal Health Office a mangiyurnus dagiti datos iti nagduduma a lugar ditoy probinsia.
Nagyaman ni Dr. Rabago kadagiti amin a nakipagpaset iti naindaklan a programa ti Department of Health iti intero a pagilian.
Inpakaammona nga awan dagiti napaspasamak a nadagsen a problema wenno dakes a napasamak kabayatan iti pannakaisayangkat ti umuna nga aldaw ti vaccination roll-out.
Mangnamnama ni Rabago nga ad-adu pay ti agpabakuna intono bigat ken iti maudi nga aldaw ti 3-Day National Vaccination Drive.
Immun-una iti daytoy, iti nakalap nga impormasion ti Bombo Radyo Laoag ket nasurok-kumurang a sangaribu dagiti balligi a nabakunaan iti Divine Word College of Laoag ken iti maysa a dakkel a mall ditoy Siudad ti Laoag.
Gagem ti maisaysayangkat a vaccination drive ket tapno magun-od ti herd immunity ken ad-adu dagiti mailisi iti makapatay a virus ditoy pagilyan.
