LAOAG CITY – Imbatad ni Mrs. Helen Dominggo ti mangidadaulo ti Provincial Sports Office a nagbalin a naannayas ti umuna nga aldaw a pannaka-implimentar iti panagsingir ti entrance fee iti Ferdinand Edralin Marcos Stadium ditoy ciudad ti Laoag.
Segun ken Dominggo, maawatan met dagiti umili ti panagsingir ti gobierno probinsyal iti entrance fee gapu ta patien da a daytoy ket makatulong para iti pannakamentinar ti nasao a pasdek.
Nu pay kasta, ket impakaammo na nga adda latta dagiti sumagmamano nga indibidual a saan pay a makaammo seknan iti daytoy.
Imbatad na a no idasig idi panawen a saan pay a nai-implimentar ti ordinansa, ket bimmassiten dagiti tattao nga agturturong ti nadakamat nga stadium.
Ngem namnamaen ni Dominggo nga iti sumarsaruno nga aldaw ket naruay tu met laeng dagiti agturong iti Ferdinand Edralin Marcos Stadium tapno agehersisyo.
Mainaig iti daytoy ket nakaukkon met ti opisina da ti pakabuklan a 6,000 a pisos bayat ti umuna nga aldaw a pannaka-implimentar ti stadium.
Kabayatanna, ti Ferdinand Edralin Marcos Stadium ket inaldaw ng aglukat iti oras ti alas kuatro ti bigat ken agrikep iti oras ti alas otso ti rabii.
