LAOAG CITY – Marigatan ti United Nations iti panangipatulod kadagiti tulong kadagiti mabisbisin a lugar idiay north Gaza gapu kadagiti nakaabbeng a kalsada.
Daytoy ket iti baet ti naan-anayen a pannakaipatungpal ti ceasefire deal iti nagbaetan ti Israel ken Hamas.
Basar iti United Nations World Food Programme, agarup 560 a metriko tonelada a taraon ti maiserserrek iti Gaza Strip iti kada aldaw kalpasan ti dua a tawen a gubat.
Inbatad ni United Nations Humanitarian Affairs Chief Tom Fletcher, masapul a dagiti aid vehicles ket makastrek iti kada lawas tapno matalantan ti kumarkaro a malnutrition, kinaawan ti pagnaedan ken pannakanarpuog kadagiti imprastraktura.
Mainaig iti daytoy, inpakaammo ti pannakangiwat ti United Nations a nagbiahe ni Fletcher idiay Gaza idi Biernes ken kinataripnongna dagiti humanitarian workers ken United Nations agencies.
Naammoan nga agarup 950 a trucks ti simrek iti south ken central Gaza idi Biernes babaen iti paset ti Kerem Shalom ken Kissufim.
