LAOAG CITY – Kinumpirmaran ni Mrs. Elizabeth Bolibol, taga Piddig, Ilocos Norte ngem agdama nga agtrab-trabaho idiay Athen, Greece nga adda ti maysa nga undocumented a pinay iti nasao a pagilyan a pimmusay.
Iti eksklusibo nga interview ti Bombo Radyo Laoag ken ni Bolibol, binigbig na ti natay a pinay a ni Leticia Rosauro Bermudez, taga Pinili, Ilocos Norte.
Inlawlawag ni Bolibol nga iti panag-highbloog ti biktima ket inpalugan lattan ti amo na iti taxi ken dagiti kakasinsin na ti nakaammo a nangipan iti ospital.
Nupay kasta, kuna na a saan a dagus nga inawat ti napanan da nga ospital gapu ta awan dagiti naipakita da a dokumento na kas iti passport, health certificate, working visa ken dadduma pay.
Segun kenkuana, saan da a nakita a dagus ti pasaporte ti biktima nga adda iti uneg ti bag na.
Innayon na nga idi awaten ti ospital ti biktima ket indeklararen ti doctor a comatose daytoy agingga a pimmusay.
Gapu ti daytoy, nagpanawagan ni Bolibol ti tulong ti gobierno ditoy probinsya para ti pannakaiyawid ti bangkay ni Bermudez.
Kabayatanna, inpasingked ti gobierno probinsyal a nakasagana da a tumulong para ken ni Bermudez.
