LAOAG CITY – Bimmaba ti 3.1% ti pakabuklana bilang dagiti Pilipino nga awanan ti trabaho a nairekord iti Labor Force Survey idi Disiembre iti napalabas a tawen.
Daytoy ket apagapaman a nababbaba maidasig idi Nobiembre 2024 nga adda iti 3.2% ti unemployment rate idinto a no idasig met idi Disiembre 2023, nagtalinaed a 3.1% ti awanan ti trabaho a Pilipino.
Basar iti datos ti Philippine Statistics Authority (PSA), daytoy ket katukad ti agarup 1.63 a milyon a Pilipino nga awan ti trabahona a nangatngato iti nagbalin a datos idi Disiembre 2023 nga adda iti 1.60 a milyon nga unemployed filipinos.
Kabayatanna, basar pay iti datos ti Philippine Statistics Authority a nakairekordda ti dumanon iti 10.9% nga underemployment rate idi Disiembre iti napalabas a tawen a nababbaba met iti nairekord nga 11.9% idi Disiembre 2023.
Iti agdama, agtultuloy ti Department of Labor and Employment (DOLE) iti panangisayangkat kadagiti job fair kas nayon nga oportunidad kadagiti Pilipino nga awanan ti trabaho.
