LAOAG CITY – Naala iti bidyo dagiti mapagduaduaan a silaw a maipagarup nga Unidentified Flying Object wenno UFO iti ngatuen ti Winnipeg River iti Canada.
Segun iti uploader a ni Justin Stevenson, agmanmaneho daytoy a kaduana ti asawana iti asideg ti Fort Alexander idi nakitada dagiti misterioso nga orb nga agmaris ti dilaw ken naraniang a kas iti init.
Kinuna ni Stevenson, a saan daytoy a mamati iti UFO, ngem kalpasan a nakitana ti karkarna a lawag ket nagtalek nga adda biag iti sabali a planeta.
Napagsasaritaan online ti nadakamat a bidyo ken nakagun-od iti nagduduma a reaksion manipud kadagiti netizens, no sadinno mamati dagiti dadduma a UFO daytoy ken saan adda met dagiti saan a mamati.
Kabayatanna, adda dagiti dadduma a nagkuna a “swamp gas” laeng daytoy manipud iti “weather balloon” a na-trap ti “thermal pocket”.
