LAOAG CITY – Ginutigot ti Philippine National Police (PNP) nga usaren ti publiko ti Unified 911 hotline no adda kalamidad pra iti insigida a panagresponde dagiti otoridad.
Segun ken ni hepe ti PNP Gen. Jose Melencio C. Nartatez Jr., ti Unified 911 a mangikonektar iti pulisya, Bureau of Fire Protection, medical services, ken rescue teams iti babaen ti maymaysa nga emergency number.
Kinuna ni Nartatez a saan laeng a para kadagiti krimen no di pay ket para iti kasapulan dagiti umili kabayatan ti bagyo ken dadduma pay a kalamidad, pakairamanan ti preemptive evacuation, search and rescue operations, ken dadduma pay nga emerhensia.
Impaganetgetna a ti insigida a panangireport kadagiti insidente ket makatulong kadagiti responders nga agresponde ti al-alisto, nangruna kabayatan ti nakaro a paniempo no sadinno a napateg ti tuggal minutos.
Innayonna nga agtultuloy ti panangpapigsa ti PNP iti emergency response capability-na babaen ti Unified 911 hotline kas paset ti panagsagana ken naparpartak a panangipaayna iti serbisio iti publiko no adda emerhensia.
