LAOAG CITY – Nangiwayat ti United Church of Christ in the Philippines – Northwest Luzon Conference ken Iglesia Filipina Independiente – National Priest Organization ti caravan para iti hustisia iti pannakatay ti maysa a Diaconal Minister a ni Alvaro Paredes Bugarin III manipud ditoy siudad ti Laoag agingga iti ili ti Pasuquin.
Daytoy ket babaen ti panangisab-itda ti tarpaulin nga adda ti nakasurat a “Justice for Mr. Alvaro Bugarin.”
Malaksid iti daytoy, nangikabilda pay ti kopya ti surat kadagiti nasao a simbaan iti munisipio iti ili ti Pasuquin ken iti Philippine National Police.
Segun ken ni Rev. Lyn Gumallaoi, Conference Minister, United Church of Christ in the Philippines – Northwest Luzon Conference, makikaykaysada iti pamilia, kabagian ken pagayam ni Alvaro iti pannakagun-od ti hustisia.
Inbatadna a ni Alvaro ket miembro ti United Church Workers Organization – Northwest Luzon Conference no sadinno a basar iti imbestigasion dagiti otoridad, nakita ti bangkay ti biktima iti asideg ti baybay iti Barangay Naglicuan iti ili ti Pasuquin idi Disiembre 27, 2025 iti oras ti 5:30 ti bigat ken natay gapu iti pannakalmes ken awan ti foul play a napasamak.
Nupay kasta, mamatida a napapatay ni Alvaro nangruna ket adda dagiti pakalasinan nga adda ti foul play a napasamak kas ti pannakaiwa ti mabagbagina, lamma ken dara iti rupa ken sumagmamano a paset ti bagina.
Gapu iti daytoy, ad-adda pay a patienda a na-torture ken napapatay ni Alvaro a saan ketdi a nalmes.
Mainaig iti daytoy, naiget a kinondenar ti Iglesia Filipina Independiente – National Priest Organization ti napasamak ken ni Alvaro no sadinno a nagpanawaganda kadagiti otoridad ti naun-uneg nga imbestigasion tapno mapatawan ti pannusa ti adda iti likudan ti insidente.
Kabayatanna, ikkis ni Mrs. Rose Marie Bugarin, ina ti biktima ti pannakagun-od ti hustisia iti kabiitan a panawen iti napasamak iti anakna.
Maipalagip a nakita a maysan a nalamiis a bangkay ti biktima nga agtawen ti 33, awanan asawa ken residente iti Barangay Cadaratan iti ili ti Bacarra iti igid ti baybay iti Barangay Naglicuan iti ili ti Pasuquin.
