LAOAG CITY – Binabalaw ti United Kingdom iti pannakaitantan ti pannakaipadanon kadagiti 1,100 a tents idiay Gaza a dumanon iti sumurok makatawen sakbay a sumangpet.
Inrakurak ni Yvette Cooper, Foreign Secretary idiay United Kingdom a dagiti dadduma a pundo ti United Kingdom ket saan a maipadpadanon kadagiti residente iti baet ti ceasefire a nagbaetan ti Hamas ken Israel.
Inbatadna a ti situasion idiay Gaza ket nagtalinaed a kumarkaro kagiddan ti panagballaag ti United Nations nga adda ti 1.5 a milyon a tattao ti agkasapulan ti pagtaengan iti kabiitan a panawen gapu iti mapaspasaran a tudo ken ti bumabbaba a temperatura a mangitunda ti nalamiis a paniempo.
Mainaig iti daytoy, dagiti tents ket makaakomodar ti lima a miembro ti maysa a pamilia no sadinno a manamnama nga adda ti 12 a ribu a tattao ti mabenepisiaran.
Naammoan nga agarup 1.9 a milyon a tattao idiay Gaza wenno 90 a porsiento iti pakabuklan a populasion iti lugar ti napukawan ti pagnaedan sipod nangrugi ti rinnupak iti nagbaetan ti Israel ken Hamas a nangrugi idi Oktubre 2023 basar iti United Nations.
Kabayatanna, inlawlawag ni Unicef Special Representative to the State of Palestine Jonathan Veitch, ti panagsangpet dagiti tents ket mangipaneknek ti mano a bulan a panangikagumaan ti international community tapno maipadanon ti ad-adu a tulong.
