LAOAG CITY – Nagpanawagan ti United Nations Children’s Fund idiay Israel nga isardengen ti panangrautda idiay Lebanon.
Kagiddan daytoy ti pannakatay dagiti sumagmamano a sibilian iti air raid ti Israel iti abagatan ti Lebanon.
Maipalagip nga idi Oktubre 8 ket agsisinnukat ti putok ti Israel ken dagiti Hezbollah nga adda idiay abagatan ti Lebanon.
Naruayen dagiti pimmusay iti nasao a rinnupak pakairamanan dagiti residente ket napukawandan ti pagtaengan.
Immunan nga inadmitir ti Israel ti nasao a panangraut iti military buildings ken terrorist infrastructures ti Hezbollah kadagiti sumagmamano a lugar iti abagatan ti Lebanon.
Nangiruar pay dagitoy dagiti ladawan ken bidyu ti fighter jets-da nga adda ti panangraut a mapaspasamak idiay Lebanon.
Sinerraan ti Israel ti Kerem Shalom crossing iti Gaza kalpasan a nangiparuk-at ti rockets ti Hamas iti lugar.
Nagresulta ti insidente ti pannakasugat dagiti 10 a tattao.
Ti nasao a crossing ket maysa kadagiti ruta dagiti humanitarian aid kas kadagiti makan ken dagiti medical supplies.
