LAOAG CITY – Naiget ti panangsuporta ni House Speaker Faustino Dy iti pumigpigsa a panawagan tapno mapagbalin a naan-anay a linteg ti Universal Social Pension para kadagiti senior citizen no sadinno nga inpetteng na nga adda ti moral nga obligasyon ti pagilian a taripatwen dagiti nataengan a Pilipino a nangidaton ti biagda ken nagsakripisyo para iti pamilya ken iti komunidad.
Inrakurak daytoy ni Dy iti opisyal a turnover dagiti pirma para iti “Labing-Dalawang Milyong Lagda para sa Matatanda”.
Segun ken ni Dy, nalawag ti iyik-ikkis ti minilyon a Pilipino a papigsaen ti tulong ti gobierno para kadagiti nataengan aglalo iti agtultuloy a panagngato ti presyo dagiti agas, taraon ken dadduma pay a kasapulan ti medikal.
Innayon na a mamati a ti pudno a panagserbi ket mangrugi iti panagdengnge, panangawat, panangisakit ken panangipateg.
Iti agdama, liitado laeng kadagiti marigrigat wenno “indigent” ti tulong pinansyal ti gobierno iti babaen ti Social Pension for Indigent Senior Citizens program, no sadinno a makaawat ti P1,000 ti kada bolan dagiti kwalipikado a benepisyaryo.
Sakopen daytoy dagiti agtawen ti 60 agpangato a nakapuyen, masaksakit, addaan ti rangkap ti bagi ken awan ti regular a pension wenno sustento a maaw-awat na manipod kadagiti kabagyan na.
Inlawlawag ni Dy a ti nailungalong nga Universal Social Pension ket saan laeng a simple nga ayuda no di ket maysa a panangbigbig iti dignidad ken nagbalin a kontribusyon ti tunggal senior citizen iti pagilian.
