LAOAG CITY – Immabante iti Finals ti last year’s runner-up University of the Philippines kalpasan nga inabakna ti University of Sto. Tomas iti iskor a 78-69 iti semifinals ti UAAP Season 87 collegiate men’s basketball tournament a naiyuswat iti Araneta Coliseum.
Nagay-ayam iti semis ti Fighting Maroons nga akin-iggem ti twice-to-beat advantage isu maysa laengen ti kasapulanda tapno makaabante iti championship round.
Indauloan ni Harold Alarcon ti UP tapno maabakda ti Growling Tigers a No.3 seed iti team standings kalpasan ti 18-game elimination round.
Nakaaramid ni Alarcon ti 16 points para iti UP idinto a ti 14 a puntos ket iti second half-na naaramid.
Inusar met ti Fighting Maroons ti kapadasanda iti dikit a laban isu a maminsan manen nga agay-ayamda ti finals iti maikapat a nagsasaruno a tawen.
