LAOAG CITY – Inbatad ni PLt. Ashley Cacayorin ti Deputy Chief of Police iti ili ti San Nicolas a nagtalinaed iti PNP Marcos ti suspek iti motornapping ti Brgy. 7 iti nasao nga ili.
Binigbig ni Cacayorin ti suspek a ni Celino Gaon Jr. y Bayudan ken residente iti Brgy. Elizabeth iti ili ti Marcos.
Kuna na nga idi rabii ti huwebes a naipadanon ti report kadakuada babaen ken ni Lester Coloma nga ama ti agtagikua ti motorsiklo a tinakaw ti suspek.
Inbatad na dita a dagus a nakikoordinar da iti pamilya a natakawan ken naamoan a naitaray ti motorisklo kalpasan a nakalukat ti arwangan ti pagtaengan dagiti biktima ken naibati ti tulbek rason nga alisto a naitaray daytoy.
Kabayatanna, kuna ni Cacayorin nga idi naireport kadakuada ti panagtakaw ket naipost metten iti social media ti video manipod iti CCTV rason nga alisto a nadeterminar ti suspek.
Inpakaammo na a naduktalan a daytoy ket taga ili ti Marcos isut gapu na a dagus a naikoordenar iti PNP – Marcos ti pasamak ken nabirok ti suspek.
Inbatad na nga iti panagimbestigar da ket naamoan nga insalda ti suspek ti tinakaw na a motorsiklo iti maysa a residente iti Brgy. Lydia iti balor a 10,000 a pisos.
Kuna na narekobre ti motorsiklo ken mapagbalin met kas witness ti nangisalda iti daytoy tapno mapaneknekan iti nagbasulan ti suspek.
Inpakaammo ti deputy chief of police a manamnama a sumango ti suspek ti kaso a panaglabsing ti RA 6539 wenno Anti-carnapping Act.
Naamoan nga immunan a napan insalda suspek ti mortorsiklo ti kadua na iti trabaho ken ti tinakaw na a motorsiklo iti ili ti San Nicolas ti insukat na.
Rumrumuar nga ado pay ti bayadan nga utang ti suspek ken daytoy ti posible a rason nu apay naaramid na ti agtakaw.
