LAOAG CITY – Inlawlawag ni Provincial Jail Warden Benilda Sadian nga apaman a naamoan da a nakalibas ni Medy Laudencia y Costales, residente iti Barangay Suyo, Dingras, Ilocos Norte, addaan ti kaso a panagrames ket insigida a nagturong da kadagiti lugar nga ammo da a mabalin a paglemmengan na.
Kuna na nga adda pay dagiti kakadwa da a napan a dagus idiay La Union gapu ta isu ti napan naglemmengen ken nakatiliwan idi ken ni Laudencia.
Inbatad na nga iti panagturong da iti balay ti ikit ni Laudencia iti Barangay Catuging iti ili ti San Nicolas ket ditoy a kinumpirmaran na a napan ti kaanakan na ken dimmawat pay ti 700 a pisos a pinagplete na a napan idiay La Union.
Innayon na a basar iti ikit ti nakalibas a balud ket inpasingked kenkuana ni Laudencia a pinalubusan dan daytoy ken ti released order na ket addan iti ina na.
Iti agdama, kuna ni Sadian nga adda pay laeng idiay Barangay Saoay, La Union dagiti kakadwa da ken kadwa dan ti asawa ni Laudencia.
Kabayatanna, nangipaay ti 20 ribo a pisos a gunguna dagiti guwardya iti INPJ manipod iti revolving fund da para iti siasinno man a makaibaga iti ayan ni Laudencia.
