LAOAG CITY – Agtultuloy pay laeng ti naiget nga imbestigasyon no anya ti rason ti pannakauram dagiti dua a pagtaengan iti Barangay 25 ditoy ciudad ti Laoag.
Segun met kenni Mr. Cris Gadia, ti agtagikua iti pagtaengan a nairaman iti uram, nakapuot da gapo ta naasok ken idi kinita da iti tawa da ket dakkelen ti apoy.
Inbatad na a pinadas na ti nangsebseb iti apoy ngem saan da a kinabaelan isut gapo na nagtaray da a rimuar.
Kinumpirmaran na nga awan pulos ti naisalbar da ken karaman kadagiti nauram ket ti 200 a ribo a pisos a pagbayad da kuma iti daga.
Kunana nga adda dagiti sayangguseng nga idi rabii ket naggi-inom da Tomas Ben Placido iti pagtaengan da ken adda ti kandila ken maipagarop a nabaybay-an ti dalikan.
Nupay kasta, inbatad ni Cris nga awan met ti babalawen na ngem saan kuma a napasamak daytoy no saan a nagbaybay-a ti maseknan.
Agpapan maisursurat ti damag ket saan pay a nakapagsarita da Gadia ken ni Placido.
