LAOAG CITY – Inbatad ni Police Captain Joseph Tayaban, chief of police ti PNP-Badoc nga agsubli iti bukod da a probinsya dagiti 26 nga indibidwal a nasalamaan iti border ckeckpoint.
Segun kenni Tayaban, iyuray da laeng ti pagluganan dagiti maseknan a construction worker gapo ta ti nagluganan da a wing van ket agtalinaed iti istasyon ti pulisya iti nasao nga ili.
Inlawlawag na nga iti idadalan dagiti maseknan iti rapid test ket nagnegatibo amin ti resulta da.
Mainaig iti daytoy, kuna ni Tayaban a maipila kas regular filing ti kaso a panaglabsing ti Art. 151 iti Revised Penal Code ken Section 9 ti RA11332 wenno Non-Cooperation of the Person identified as having the notifiable diseases affected by the health in event of public concern.
Maipalagip nga idi kalman ket nasita ti nagluganan da a wing van nga inturong ni Reymond Saracin y Magdasoc, agtawen ti 24, awanan asawa ken residente iti Santol, Balagtas, Bulacan.
Inbatad ni Tayaban nga apaman a pinalukatan da ti wing van ket nakita da ti 24 a lallaki a nakalugan malaksid ti kaabay ti driver iti sango.
Kuna na a bayat ti panangsita da kadagiti maseknan ket awan ti ania man a dokumento a mangpaneknek ti pannakapalubos da nga agbiyahe.
Inpakaamo na a dagiti nasao a construction workers ket 12 dagiti naggapo iti Taytay Rizal, pito manipod iti Muntinlupa City, Tallo iti Las Piñas ken uppat iti Bulacan.
Naamoan a dagiti maseknan ket mapan kuma iti ili ti San Nicolas tapno agtrabaho iti Sta. Monica Homes, ti New AFP/PNP Housing Project of National Housing Authority iti Brgy. 17 iti ili ti San Nicolas.
First report – https://www.bomboradyo.com/laoag/26-a-construction-workers-a-natiliw-iti-border-checkpoint-iti-ili-ti-badoc-mapilaan-da-ti-reklamo/
