LAOAG CITY – Mamati ti tallo kadagiti uppat a Barangay Health Workers iti Barangay 7 iti ili ti San Nicolas nga adda ti maris pulitikana ti panangikkat ni Barangay Chairman Crisanto Coloma Jr. kadakuada.
Segun ken ni Ms. Mina Joy Manalo, maysa kadagiti inikkat ni Kapitan Coloma Jr. a Barangay Health Worker iti barangayda nga awan man laeng ti pormal a panangipakaammo ti Kapitan kadakuada maipanggep iti pannakaikkatda.
Inbatadna nga apaman a naammoanna daytoy a banag ket insigida daytoy a nagturong iti pagtaengan ti Kapitan no sadinno a sinaludsod no apay nga ikkantenna isuda kas Barangay Health Workers.
Inlawlawagna a ti nagbalin a sungbat kenkuana ti Kapitan ket gapu ta saanda a kinadua isuna idi napalabas nga eleksion.
Gapu iti daytoy, inpeksana ti pannakadismayana ken ni Kapitan Coloma Jr. gapu ta saan a nasurot ti kayatna a mabutosan a kandidato.
Mainaig iti daytoy, inpetteng ni Mr. Noel Castro, maysa pay kadagiti inikkat ni Kapitan Coloma Jr. a Barangay Health Worker a mangipilada ti reklamo kontra iti Kapitan.
Kunana nga amin met a bilin kadakuada ti Kapitan ket sursuroten ken tungtungpalenda.
Innayonna a saan nga accredited ken registered dagiti uppat a Barangay Health Workers nga insukat ti Kapitan kadakuada.
Maipalagip nga inadmitir ni Kapitan Coloma Jr. ti Barangay 7 iti ili ti San Nicolas nga inikkatna dagiti uppat a Barangay Health Workers gapu ta maipagarup a saanda a patpatgan dagiti pammilinna kadakuada.
