LAOAG CITY – Nagtalinaed iti kustodyar ti PNP-Laoag dagiti tallo manipod iti pito a natiliw nga indibidual gapu iti illegal a panagsusugal da iti Barangay 6 ditoy ciudad ti Laoag.
Daytoy ket gapu ta saan pay a nakapagbayad ti piyansa dagiti tallo a nagtalinaed iti kustodyar ti PNP ditoy ciudad ti Laoag.
Maipalagip a natiliw dagiti pito nga indibidual a pakairamanan ni Barangay kagawad Rogelio Padaca kalpasan a naaktwan dagiti kameng ti pulisya ti panagay-ayam da ti Lucky 9 iti maysa a minatayan iti nadakamat a barangay.
Nakumpiskar dagiti otoridad iti lugar ti 4,570 a pisos, maysa a set ti baraha, tugtugaw ken lamisaan.
Naamoan a dagiti tallo a saan a nakapagpiyansa ket adda da iti abay ti custodial facility gapu ta nakalockdown ti mismo a custodial facility kalpasan nga adda dagiti nagpositibo ti antigen test na iti kallabes.
