LAOAG CITY – Nabigbigen dagiti otoridad dagiti tallo a natay a maipagarup a nakipinnutok kadagiti otoridad iti naiwayat a raid iti maysa a compound iti Barangay Tapao-Tigue, Currimao, Ilocos Norte itay parbangon.
Ti maysa kadagiti natay ket anak ni Delfin Guiang nga maatap a gun runner ken target ti raid a ni Donnel Guiang, idinto a dagiti dua ket isuda Joseph Coloma, taga Barangay 17, Samac ti ili ti San Nicolas kenni Glenn Esteban nga taga Barangay Baay, Batac City.
Iti agdama ket saan pay a naestablisar dagiti otoridad no apay nga adda iti nasao a lugar da Coloma kenni Esteban.
Rumrumuar nga dagiti natay ket kameng ti gun for hire group ken ti subject ti search warrant a ni Delfin Guiang ket awan iti lugar idi naiwayat ti raid.
Nakumpiskar iti raid ti adu nga high-powered firearms ken high explosives kas ti TNT explosives ken M203 grenade.
Naammuan nga iti panangiwayat dagiti otoridad ti search ket nakipinnaltog dagiti suspek kadagiti pulis ken nagkikinnamatan da iti katurodan a paset ti lugar.
Awan met ti naipadamag a nadangran a kameng ti PNP.
Agtultuloy met ti clearing operation dagiti otoridad iti nasao a lugar.
