LAOAG CITY – Umabot iti 31 a pamilya wenno kaibatugan ti 116 nga indibidual ti apektado ti layos ditoy ciudad ti Laoag.
Daytoy ti inpakaammo ni Mrs. Perlita Cabello, ti mangidadaulo iti City Social Welfare and Development ditoy ciudad.
Kuna na a saan a naikabil amin kadagiti evacuation center dagiti pamilya nga apektado ti layos ditoy ciudad ti Laoag gapu ta dagiti dadduma ket napanda nakipagnaed iti balay dagiti am-ammo wenno kabagya da a nangatngato ti lugar da, idinto nga adda dagiti nagtalinaed iti pagtaengan da nga addaan ti second floor.
Inpasingked ni Cabello a nakamonitor amin nga ahensya ti gobierno ditoy ciudad ti Laoag iti sitwasyon kabayatan ti panagpasar ti napigsa a tudo nga epekto ti habagat.
