LAOAG CITY – Umaboten iti 32 nga indibidual ti nakumpirmaran a natay gapu iti nagtipon nga epekto ti Habaga ken kadagiti naglabas a Bagyo Luis, Maymay ken Neneng, basar iti baro a report ti Office of Civil Defense (OCD).
Nairekord iti siudad ti Benguet ti kaadoan a nagbalin biktima no sadinno ket umabot iti 15 nga indibiual ti natay gapu iti nakaro a panagreggaay ti daga.
Malaksid iti Benguet, nakairekord met dagiti lugar ti La Union, Rizal, Batangas, Quezon, Mindoro, Negros Occidental ken Caloocan dagiti natay gapu iti pannakalmes, electrocution, rockslide ken panagtulid dagiti kayo.
Kabayatanna, nairekord pay dagiti 19 nga indibidual a nasugatan bayat a tallo dagiti manarimaan a mabirbirok iti Quezon City, Manila ken Batangas.
Gapu ti daytoy, umaboten iti 8 a million nga indibidual wenno sumurok-kumurang 2.3 million a pamilya ti naapektaran ti saan a napintas a sasaaden ti panawen iti nagduduma a paset ti pagilian. pakairamanan dagiti sumurok 25,800 nga indibidual a manarimaan nga agtaltalinaed kadagiti evacuation center. ken umabot pay iti P6.11 million ti nairekord a pannakadadael dagiti imprastraktura bayat a P2.32 billion met ti nadadael iti sektor ti agrikultura.
Kabayatanna, umabot iti 3,000 a pagtaengan dagiti nadadael, bayat a 117 local government unitsen ti nagdeklarar ti State of Calamity.
