LAOAG CITY – Nagpositibo iti naiwayat a drug test dagiti uppat a suspek iti naiwayat a dragnet operation ti paset ti Barangay 11, Darat iti ili ti Pinili.
Daytoy ti kinumpirmaran ti Philippine National Police iti ili ti Bacarra.
Nabigbig dagiti suspek nga isuda Kevin Doropan Sinio, taga Manila; Roland Igne Jabatan, taga Pangasinan; Glen Tandoc delos Santos, taga Tacloban ken ni Jimmy Gavino Tapales, a taga Pangasinan.
Maipalagip nga, immuna nga adda ti binudol dagiti suspek a maysa a baket, nga agtawen ti 89 iti paset iti ili ti Bacarra no sadinno a naala da kenkuana ti sumagmamano nga alahas kas ti kwentas, aritos, singsing, cash a 14 a ribo a pisos ken adda pay ti dolyar.
Gapu iti napasamak ket naki-koordinar a dagus ti Philippine National Police iti dadduma a municipal police stations karaman iti ili ti Pinili no sadinno nga iti naisayangkat a dragnet operation ket ditoyen a natiliw da dagiti suspek a naglugan ti maysa a Nissan nga agmaris ti puraw .
Iti panagsukimat dagiti otoridad iti uneg ti lugan ket nakarekobre da ti lima a sachet a naglaon ti maipagarop a shabu, lima a pedaso ti foil paper, dua a lighter, facemask ken agmaris ti asul a mentos canister.
Malaksid iti daytoy, inadmitir ti maysa kadagiti suspek a binudol da ti baket iti ili ti Bacarra ngem naiget a naglikudan na dagiti naala nga illegal a droga iti nagluganan da.
Kabayatanna, ti urine/drug test ket nai-release babaen ti Ilocos Norte Provincial Forensic Unit.
Iti agdama, manamnama a mapilaan ti kasao dagiti uppat gapu iti panaglabsing da ti Swindling ken Republic Act No. 9165 wenno ti Comprehensive Dangerous Drugs Act of 2002.
