Napilaanen ti kaso a theft dagiti uppat nga indibidual a naarestar gapu iti panagtakaw da iti maysa a pasdek negosyo iti paset ti Barangay 50, Buttong ditoy ciudad ti Laoag.
Daytoy ti inbata ni Police Lt. Col. Ryan Retotar, ti chief of police ditoy ciudad ti Laoag.
Maipalagip a nakita dagiti empleado iti pasdek negosyo babaen ti Closed Circuit Television ti panangik-ikkat dagiti suspek ti packaging dagiti items kalpasan na ket idulin da dagiti kahon ken in-inuten da nga iruwar dagiti nasao a produkto.
Naamoan a sinisiim latta dagiti empleado dagiti suspek agingga a nairuwar da dagiti produkto nga innala da.
Iti kaaddan dagiti suspek iti ruwar ken dagiti innala da a produkto ket ditoyen a kinemmeg da dagitoy kagiddan ti panagreport da iti Philippine National Police.
Karaman kadagiti tinakaw a produkto dagiti suspek ket ti balde, beddings ken dadduma pay.
Rumrumuar a dagiti naarestar a suspek ket taga Caloocan City ken maipagarop a nagturong da laeng ditoy Ilocos Norte tapno agipatungpal ti panagtakaw.
