LAOAG CITY – Inpakaammo ni P/Capt. Kester Arellano, Hepe ti Sarrat Municipal Police Station a dumanon iti 102 a ribu a pisos ti balor dagiti 45 a transparent plastic sachet a naglaon ti maipagarup a shabu nga agkaiwarang iti igid ti kalsada iti Brgy. 22 iti ili ti Sarrat.
Segun kenkuana, rumrummuar iti inwayatda nga imbestigasion a posible nga inbati wenno inpurwak ti suspek dagiti mapapati a shabu apaman a nakitana nga adda dagiti kameng ti pulisia a mangiwaywayat ti checkpoint.
Inbatadna nga adda ti pakainaiganna daytoy iti napasamak a pammaltog iti ili ti Vintar iti kallabes isu a nangiwayatda ti drug net operation.
Maipalagip a nakita ken napidot ni Mr. Mardy Ignacio, agtawen iti 28, awanan asawa, street vendor, tubo idiay Pampanga ngem agdama a residente iti Brgy. Palpalicong iti siudad ti Batac dagiti naiwarang a sachet a naglaon ti maatap a shabu.
Kabayatanna, agtultuloy pay laeng ti maiwaywayat nga imbestigasion maipanggep iti nasao a banag.
