LAOAG CITY – Agtultuloy ti panangbirok dagiti kameng ti Philippine National Police Dingras kadagiti lima a suspek a naglibas kalpasan a naaktuan nga agsusugalda iti maysa a minatayan.
Daytoy ti inpakammo ni Police Master Sergeant Neil Jan Andres, Assistant Investigator.
Inlawlawagna a napilaanen ti kaso dagiti suspek pakairamanan dagiti lima a saan pay a nabirukan iti panaglabsing ti Presidential Decree 1602 wenno ti Illegal gambling.
Immuna a naarestar ti Barangay Chairman ti Sitio 3, Brgy. Barong iti ili a Dingras a ni Edilberto Gudoy, agtawen ti 64, naasawaan ken Felix Doropan, agtawen ti 56, naasawaan ken maysa a mannalon a residente iti nasao met laeng a Barangay.
Nabigbig dagiti lima a suspek a naglibas a da Lorenzo Butay, Charito Gudoy, agpada nga agnanaed iti Brgy. Barong, Jenelyn Castillo, residente ti Brgy. Raraburan ditoy ciudad ti Laoag, Jazel Castro ken Jaypee Tutop, agpada a residente ti Brgy. Parado iti nadakamat nga ili.
Segun kenni Police Master Sergeant Neil Jan Andres, Assistant Investigator, natiliw dagiti suspek kalpasan a naaktuan dagitoy a mannarimaan nga agsusugal iti maysa a minatayan.
Maipalagip a nakumpiskar kadagiti suspek ket umabot ti 47,180 pesos ti kantidad dagiti kuarta.
