LAOAG CITY – Addan ti dua a persons of interest ti Philippine National Police (PNP) mainaig iti pannakapalto-paltog a poon ti nakatayan ni Engr. Rommel Dizon iti Barangay 2 iti ili ti San Nicolas.
Daytoy ti kinumpirmaran ni Police Major Joseph Baltazar, ti chief of police iti ili ti San Nicolas.
Inlawlawag ni Baltazar nga iti agdama ket ibirukan da pay ti naan-anay nga ebidensya dagiti dua a persons of interest tapno kongreto ti ipila da a reklamo kontra kadakuada.
Segun kenkuana, basar iti panangrebisar da kadagiti CCTV footages ken palawag dagiti testigo ket naestablisar da dagiti dua a persons of interest a dagitoy ket isu ti gunman ken driver ti motorsiklo nga adda iti agdama iti kustodyar da.
Innayon na a ti kitkitaen da a motibo ket adda ti pannakainaig na iti propesyon ti biktima no sadinno nga adda dagiti saan na a nalpas a proyekto ken adda dagiti tao na a nakariri na kadagiti naglabas nga aldaw.
Mainaig iti daytoy, kuna ni Baltazar nga iti agdama ket itultuloy da ti agkalkalap ti ebidensya ken dokumento a kasapulan tapno naan-anayen a maipila da ti reklamo kontra kadagiti suspek.
Nagkedked metten ti opisyal a nangipaay ti dadduma a detalye mainaig iti pakabigbigan dagiti suspek no sadinno a naibaga na laeng a mabalin a dagitoy ket maibilang a gun for hire basar iti nagbalin nga aksyon da iti nakapasamakan ti pammaltog.
Kabayatanna, inpakaammo ni Baltazar a basar iti otopsya ti bangkay ti biktima ket lima ti sinagaba na a tama ti bala ti paltog no sadinno a maysa iti buksit, barukong, tengnged, ima ken bukotna.
