LAOAG CITY – Agtultuloy ti iyus-uswat a naun-uneg nga imbestigasyon dagiti otoridad iti napasamak a pammaltog iti Barangay Nagsanga iti ili ti Pasuquin a nakatayan da Larry Bumiltac alyas “Boy Kulot”, agtawen ti 36 ken ni Anicia Carunan, agpada a residente iti Brgy. Pangil iti met laeng nasao nga ili.
Iti panagsawar dagiti kameng ti Crime Laboratory Office iti Ilocos Norte Police Provincial Office (INPPO) ket nakarekobre da iti nakapasamakan ti pammaltog ti maysa nga slug ti kalibre 45 a paltog, 4 a basyo ti kalibre 45 ken 2 a basyo ti cal. 30, maysa a sopresor, maysa a bala ti kalibre 45, ken maysa a magazine para iti kalibre 45 a paltog nga addaan ti pito a bala.
Mainaig iti daytoy, iti pannakaeksamen ti bangkay dagiti biktima ket naduktalan a ni Bumiltac ket nagsagaba ti nakana a sugat iti ulo ken bagina idinto a ni Carunan ket nagsagaba ti nakana a tama ti paltog iti bagina.
Kabayatanna, inbatad ni Police Corporal Harold Aguilar, maysa kadagiti imbestigador iti PNP iti ili ti Pasuquin a sakbay ti pammaltog ket napan pay laeng ni Bumiltac iti kwerpo ti pulisya gapu ta adda ti napan na kinuyog a nagpablotter gapu iti isyu iti panagtagtagbat ti baka.
Inpakaammo na nga iti panagtultuloy ti imbestigasyon da ket adda ti nagparang a testigo no sadinno nga inbaga na a ti maysa kadagiti kakadwa dagiti biktima a ni Carl Daniel Tabay ket naagaw na ti kalibre 45 a paltog a kukua ti maysa kadagiti suspek kalpasan na ket inpurwak na iti kataltalunan nga isu met ti narekobre da.
Nupay kasta, inlawlawag ni Aguilar a ti dakdakamaten na a testigo ket saan a kadwa dagiti biktima.
Kuna na pay a basar iti testigo ket nagnagna laeng dagiti dua a suspek a napan iti nakapasamakan ti pammaltog ken kalpasan ti krimen ket nagtartaray da a kimmamang iti kabanbantayan a paset ti nasao a lugar.
Inpalgak na a basar iti tama ti paltog ket ti puntirya dagiti suspek ket ni Bumiltac ngem mabalin a nairaman laeng ni Carunan, ngem masapol nga itultuloy da latta ti agimbestigar tapno maamoan no ania ti pudno a motibo ken ti kinatao dagiti suspek.
