LAOAG CITY – Kinumpirmaran ni Police Major Paul Benedict Parado, chief of police ti PNP-San Nicolas nga addan ti person of interest iti pannakapapatay ni Juvilyn Bardiaga, asst. manager ti dakkel a groserya iti nasao nga ili.
Segun kenni Parado, aktibo nga agtrab-trabaho iti nasao a pasdek ti person of interest ngem naggapo iti sabali a lugar.
Nupay kasta, kuna ni Parado a manarimaan pay laeng ti panangireview da iti CCTV ken panangala da ti statements dagiti kaubraan ti biktima tapno makumpirmaran a ti person of interest ket isu ti suspek iti krimen.
Inlawlawag na a basar kadagiti palawag dagiti kaubraan ni Bardiaga ket naulimek, awan ti ammo da a karirriri na iti pagtrabahoan ti biktima.
Mainaig iti daytoy, kuna ni Parado a mabalin nga ipatulod dagiti CCTV footages iti Camp Crame tapno makita a nalaing ti pakabigbigan ti suspek.
Kunana a ti cellphone ti biktima ket addan iti Regional Office ti PNP parikular ti Cyber Crime Group a makabael a manglukat iti nasao a gadget.
Nagyaman met ti ina ni Bardiaga iti PNP gapo ta addan ti paglawlawagan ti kaso ti anak na ken mangnamnama a maammoan ken matiliw ti suspek.
