LAOAG CITY – Inbatad ni Mr. Jay Cumlat, ti adviser ti Central Student Council iti Divine Word College of Laoag ditoy ciudad ti Laoag nga awan ti kinapudno na iti alegasyon a maibatbato kadakuada mainaig iti panangmulta da kadagiti estudyante nu saan da nga agbayad iti uniporme a mausar iti intramurals iti nasao a pagadalan.
Mainaig iti daytoy, inlawlawag ni Mr. Leo Albano, ti Central Student Council Sub-Secretary nga adda ti tallo a resolusyon nga inaramid ti student council ti Divine Word College a mairequire kadagiti estudyante a gumatang iti kawes da.
Inlawlawag na a gagem ti maysa a resolusyon nga ad-adda a mapintas ti pannakaselebrar iti intramurals iti pagadalan ken tapno makita dagiti miembro iti kada grupo.
Inpakaammo na a naipalaon met iti maysa a resolusyon a ti nasao nga uniporme ket agbalor iti 380 a pisos.
Kuna pay ni Albano a nangisayangkat da ti tallo a nagsisina a general assembly ita a bolan tapno ipresentar dagiti nasao a resolyusyon ken awan pulos ti negatibo a reaksiyon manipod kadagiti agad-adal iti nasao a pagadalan.
Kabayatanna, nagpanawagan ni Cumlat kadagiti estudyante a no adda ti problema dagiti estudyante ket silulukat iti opisina da a dumngeg tapno masolbar dagiti pakaseknan da.
Immuna iti daytoy, adda ti naidanun a reklamo iti Bombo Radyo Laoag manipod iti maysa nga estudyante iti Divine Word College of Laoag seknan iti maipagarop a pannakapwersa da a gumatang ti uniporme nga agbalor ti 400 a pisos gapu ta no agkedked dagitoy ket mamulta da ti 300 a pisos.
