LAOAG CITY – Napilaanen ti kaso a Republic Act No. 9165 wenno Comprehensive Dangerous Drugs Act of 2002 dagiti ag-live in partner nga agpada a naarestar iti naiwayat nga Anti-Illegal Drug Buy-bust Operation iti Brgy. Pangil iti ili ti Currimao.
Daytoy ti inpakaammo ni P/Capt. Elison Pasamonte, Hepe ti Badoc Municipal Police Station.
Segun kenkuana, nalpasen ti pannakaiproseso dagiti kasapulan a dokumento kontra kadagiti ag-live in partner.
Inlawlawagna a basar iti resulta ti pannakaipadalan ti drug test dagiti maseknan nga ag-live in partner ket agpada dagitoy a nagpositibo.
Maipalagip a natiliw dagiti ag-live in partner nga isuda Ernie Jay Dahilig alyas “Bursio,” agtawen iti 45, residente iti Barangay Napu iti ili ti Badoc ken ti live in partner-na a ni Joana May Modejar, taga Barangay Sta. Rita iti ili ti Paoay ngem agdama nga agnanaed iti Barangay Napu iti ili ti Badoc.
Immuna iti daytoy, nakumpiskar pay dagiti otoridad iti ikot ni Dahilig ti saggaysa a coin purse, glass tooter, color red lighter cricket, improvised straw idinto a naala met ken ni Mondejar ti maysa a pedaso ti genuine One Thousand Peso bill kas buy-bust money, maysa nga heat sealed transparent plastic sachet a naglaon ti maipagarup a shabu ken maysa a white paper open sealed.
Naammoan a mapatta-patta nga agdagsen ti nakumpiskar a maipagarup a shabu iti sumurok-kumurang a maysa a gramo nga addaan ti Standard Drug Price a 7,500.00.
