LAOAG CITY – Innagananen dagiti otoridad ti agama a suspek iti pammaltog iti Bondi Beach idiay Australia.
Dagitoy ket isuda Sajid Akram nga agtawen ti 50 idinto a ti anakna ket nabigbig a ni Naveed nga agtawen ti 24.
Basar kadagiti otoridad, target dagiti suspek ket dagiti Hudyo a nagatendar iti Hanukkah event.
Iti imbestigasion, karaman kadagiti nagbalin a biktima ti agtawen ti 10 nga ubing a babai, British-born rabbi, retired police officer ken Holocaust survivor.
Naipadamag a dagiti armado a lallaki ket nagkari ti kinapudno iti grupo ti Islamic State idinto a dagiti bandera ti Islamic State ket nabirukan kadagiti luganda.
Maipalagip a natay ti ama a suspek iti nakapasamakan ti insidente idinto a ti anakna ket adda iti kritikal a kondision.
Kabayatanna, inrakurak ni Prime Minister Anthony Albanese a dagiti suspek ket saan a paset ti terror cell ngem nalawag a dagitoy ket naallukoy babaen ti extremist ideology.
