LAOAG CITY – Maladingitan dagiti agtartaraken ti baboy iti Barangay San Marcelino iti ili ti Dingras gapu iti pannakaisakripisyo dagiti taraken da kalpasan nga adda ti nagpositibo ti African Swine Fever (ASF) iti nadakamat a barangay.
Inbaga ti maysa kadagiti agtartaraken iti nasao a barangay a ni Mrs. Anita Anaya, uppat ti taraken na a baboy a masapol nga isakripisyo na babaen ti pannakakuryente ken pannakaikali da tapno maliklikan ti ad-adda pay a panagwaras ti ASF virus saan laeng nga iti barangay da no di ket iti pay sabali a lugar.
Inbatad na a masapol a sumurot da iti pammilin ti Department of Agriculture (DA) gapu ta isu ti rebbeng na a maaramid.
Naamoan a mabayadan ti 5 ribo a pisos ti kada head ken innem a sitio iti Barangay San Marcelino ti apektado.
Immuna iti daytoy, kinataripnong ti Provincial Veterinary Office nga idaulwan ni Doctor Loida Valenzuela, Municipal Agriculture Office (MAO) ken ni Mayor Joefrey Saguin iti ili ti Dingras dagiti agtartaraken ti baboy iti nasao a barangay a maapektaran iti uneg ti 500-meter radius manipod iti ayan ti nagpositibo iti ASF a baboy.
Kabayatanna, inbaga ni Barangay Chairman Larry Pasalo iti Barangay San Marcelino iti ili ti Dingras a naiget ti panagbantay da kadagiti agtartaraken ti baboy a kabarangayan na.
Innayon na a possible nga umabot iti 500 a baboy ti maisakripisyo iti barangay da gapu iti ASF.
