LAOAG CITY – Kinumpirmaran ni Dr. Rizalina Manzano, School Principal ti Piddig National High School a maiyakar dagiti dua nga agkabsat nga estudiante iti sabali a pagadalan.
Segun kenkuana, daytoy ket kalpasan a napanunutan dagiti nagannak dagiti agad-adal a nasaysayaat lattan a maiyakar dagiti annakda iti sabali a pagadalan tapno maliklikan a maulit ti nasapamak nga insidente iti kallabes.
Nupay kasta, inbatadna a saanna pay laeng a maibuksilan no ayanno a pagadalan ti pagakaran dagiti maseknan nga estudiante.
Kabayatanna, saan a direkta a sinungbatan ni Dr. Manzano no maikkan ti Good Moral Certificate dagiti dua nga agad-adal banag nga isu ti kangrunaan a kasapulan tapno maka-transfer ti maysa nga estudiante.
Maipalagip a kinumpirmaran ni Ms. Marisal Nicolas, Guidance Coordinator ti Piddig National High School a dinangran ti dua nga estudiante nga agkabsat ti maestro a ni Mr. Marlon Agustin.
Immuna iti daytoy, adda ti manamnama a tignay protesta ita nga aldaw, Setiembre 16 babaen kadagiti nagannak ken mangisursuro ditoy probinsia kalpasan nga adu dagiti indibidual a mangibagbaga a saanda a mapnek iti rekomendasion wenno solusion iti biang ti Piddig National High School nangruna iti mangidadaulo a ni Dr. Manzano.
