LAOAG CITY – Kinumpirmaran ni Mr. Jovy Butac, presidente ti Seven Colors Marketing Cooperative iti Barangay Caroan iti ili ti Pasuquin nga iti pagtaengan da ti nagturongan dagiti kameng ti PNP-Laoag ken dagiti kameng ti DENR.
Segun kenni Butac, idi naamoan na nga adda ti natiliw gapo iti panagibyahe ti pebbles ket nakigtot isut gapo na nga uray agingga ita ket saan na pay nga ammo ti pakabuklan daytoy a daytoy.
Ummuna iti daytoy, ti nadakamat a nagan a naggapoan dagiti 100 a sako ti pebbles ket maysa nga agnagan ti “Danilo”.
Inbatad na nga ado ti am-ammo na nga agnagan ti Danilo ken maysa ditoy ti kabsat na ngem awan met ti nakitkita na a truck gapo ta na nasapa a naturog idi rabii ken saan unay nga agruruwar.
Inlawlawag na a no agsublin to man dagiti kameng ti PNP-Laoag ti kabsat na a ni Danilo ken no maimbestigar ket nakasagana a mangisango daytoy ken no mapaneknekan a daytoy ket nagbasol, patien na a masapol a sungbatan na daytoy.
Saan a patien ni Butac nga aggapo iti Barangay da dagiti pebbles a nailugan iti truck a natiliw ditoy ciudad ti Laoag.
Mainaig iti daytoy kunana pay nga adda dagiti miembro ti kooperatiba nga adda pay laeng ti stock na kadagiti pebbles.
Iti sabali a bangir, kalikagom na a maipaay kuma metten ti nabayagen a kalkalikagoman da a baro a permit a mangilako wenno mangibyahe iti pebbles nga stock da ken naala da idi addaan da pay laeng ti permit.
Kabayatanna, inbutaktak ni Barangay Chairman George Ragunjan iti Barangay Caroan a nagpatulong kenkuana ni Mr. Danilo Butac.
Daytoy ket gapo iti pannakatiliw ti maysa a truck a nagkarga ti 100 a sako a pebbles.
Segun kenni Ragunjan, inbaga na met kenni Danilo Butac nga awan ti maaramidan na wenno maitulong na iti pannakatiliw ti naibyahe a pebbles.
Nasdaaw ni Ragunjan gapo iti pannakatiliw daytoy gapo ta nabayag idin sipud rimwar ti isyu seknan iti permit.
Inbatad na nga awan met dagiti makitkita na a mapan agal-ala ti pebbles ken kanayon na a bagbagaan dagiti kabarangayan da a saan da nga agal-ala gapo ta basol daytoy.
