LAOAG CITY – Inpakaammo dagiti imbestogador ti Philippine National Police ditoy siudad ti Laoag nga agtultuloy ti panangiwayatda ti hot pursuit operation kontra iti suspek ti pammagkong iti Brgy. 37 Calayab.
Nabigbog ti babai a biktima nga agtawen ti 47, awanan asawa, business owner, ken residente iti nasao a lugar.
Segun iti Philippine National Police ditoy siudad, agtultuloy pay laeng ti panangsapolda iti suspek.
Basar iti imbestigasion agarup ala una ti parbangon idi Oktubre 10, nagturong ti biktima iti pagtaengan a manarimaan ti panag-videoke-da tapno ikapkapsot ti videoke gapu ta makaistorbo kadagiti kaarrubada.
Gapu iti daytoy, nakaunget ti suspek ket napanna kinomprontar ti biktima agingga a nagbinnara dagitoy.
Timmalaw ti suspek ngem idi nagsubli ket adda ti iggemna a natadem a banag nga isu ti inusarna a nangbagkong iti biktima iti sumagmamano a daras.
Naammoan nga adda ti dua a saksi ti naganawa iti suspek a dagus met a naitaray ti biktima iti Laoag City General Hospital para iti pannakataming dagiti sugat iti nagduduma a paset ti bagina.
Kabayatanna, no saan a matiliw dagiti otoridad ti suspek ita nga aldaw ket manamnama a maipilan daytoy iti maiyanatop a kaso kontra kenkuana.
