LAOAG CITY – Inbabawi ni alyas Rose dagiti nagbalin a rakurak na kontra iti live-in partner na ken iti maysa a konsehal iti ili ti Badoc.
Maipalagip nga iti immuna nga interview ken ni alyas Rose ket inakusaran na ti live-in partner na kasta pay iti maysa a konsehal a maipagarop a kinabkabil da daytoy gapu iti post iti online a “kaimas ti agawat, urayla dumandanun parparbangon”.
Kuna na nga idi napan iti farm ti konsehal a pagserserbian ti live-in partner na kas personal assistant tapno alaen ti anak da ket sinalangad ti nasao nga opisyal kalpasan na ket maipagarop a binekkel, dinanog ken inpadeg na pay daytoy.
Innayon na a malaksid iti konsehal ket dinangran pay a mismo ti live-in partner na isut gapuna a nasakit ti nakem na ken pursigido nga agpila ti reklamo kontra kadagitoy.
Nupay kasta, inbabawi amin ni alyas Rose dagiti nagbalin a rakurak na ken nagpadespensar kangrunaan na iti nadakamat a konsehal.
Inpalgak na a dagiti insawsawang na ket bunga laeng ti nakaro a pungtot ken emosyon na kalpasan a nagriri da iti live-in partner na, ken adda dagiti indibidual a nangsugsog kenkuana.
Kabayatanna, patien ti nadakamat a konsehal a mabalin a ti nangsugsug ken ni alyas Rose ket dagiti kalaban na iti pulitika.
Inkalintegan na a naganawa laeng gapu ta nagriri ni alyas Rose ken ti live-in partner na iti mismo a farm na.
